ଉତ୍ତର-ଅଶୀ ଓଡ଼ିଆ କବିତା ଜଗତର ଜଣେ ବଶିଷ୍ଠ ତଥା ପ୍ରତିଭାବାନ ସ୍ରଷ୍ଟା ହେଉଛନ୍ତି କବି ସେନାପତି ପ୍ରଦ୍ୟୁମ୍ନକେଶରୀ । ପ୍ରସ୍ତୁତ ପ୍ରବନ୍ଧରେ ତାଙ୍କର କାବ୍ୟ ଚେତନା ଓ ସାରସ୍ୱତ ସୃଷ୍ଟିର ବିଭିନ୍ନ ଦିଗ ଉପରେ ଆଲୋକପାତ କରାଯାଇଛି । ସମକାଳୀନ ଜୀବନବୋଧ, ସମାଜର ନିଛକ ଚିତ୍ର ଏବଂ ଯନ୍ତ୍ରଣାଦଗ୍ଧ ମଣିଷର ଅନ୍ତରର କଥା ତାଙ୍କ କବିତାର ମୂଳପିଣ୍ଡ । କବିଙ୍କର ‘ମହୁ ମୁହାଣ’  ଠାରୁ ଆରମ୍ଭ କରି ‘ପବନର ଦେହ’ ପର୍ଯ୍ୟନ୍ତ ଦଶଟି ପ୍ରମୁଖ କବିତା ସଂକଳନ ମଧ୍ୟରେ ଗତିଶୀଳ କାବ୍ୟ-ଯାତ୍ରାକୁ ଏହି ଆଲେଖ୍ୟରେ ମୂଲ୍ୟାୟନ କରାଯାଇଛି । କବିଙ୍କ ସୃଷ୍ଟିରେ ଥିବା ଶାଶ୍ୱତ ରୋମାଣ୍ଟିକ୍ ଚେତନା, ଆଧୁନିକ ମଣିଷର ନିଃସଙ୍ଗତା ବା ଏକାକୀତ୍ୱବୋଧ ଏବଂ ନାରୀ ଜୀବନର ବିବିଧ ସଂଘର୍ଷ ତଥା ସମ୍ବେଦନାକୁ ଭିନ୍ନ ଭିନ୍ନ ଶୀର୍ଷକରେ ବିଶ୍ଳେଷଣ କରାଯାଇଛି । ଭାଷାର ପ୍ରାଞ୍ଜଳତା, ଚିତ୍ରକଳ୍ପ ଓ ପ୍ରତୀକର ସଫଳ ପ୍ରୟୋଗ ଏବଂ ସଂଳାପଧର୍ମୀ ଶୈଳୀ କିପରି ତାଙ୍କ କବିତ୍ୱକୁ ଓଡ଼ିଆ ସାହିତ୍ୟରେ ଏକ ସ୍ୱତନ୍ତ୍ର ମର୍ଯ୍ୟାଦା ପ୍ରଦାନ କରିଛି, ତାହା ଏହି ପ୍ରବନ୍ଧର ମୁଖ୍ୟ ପ୍ରତିପାଦ୍ୟ ବିଷୟ ।